ЭЛЬМИР НӘБИУЛЛИН: “РУБИН”ДА УЙНЫЙСЫ КИЛӘ”

Дәрвишләр бистәсендә туып-үскән малай ул. Кечкенәдән туп тибәргә яратуы “Рубин” футбол командасына юл ачты, соңрак “Зенит” белән ил чемпионы булды. Хәзер исә “Сочи” футбол командасы данын яклый. Күңеле барыбер туган йортка тарта икән.
Сүзебез Эльмир Нәбиуллин турында. “Сочи” клубының твиттеры 24 яшьлек футболчының сүзләрен китерә.

Йолдызлык чире турында: “Гаиләм гади. Миңа беркайчан да йолдызланырга мөмкинлек тудырмадылар. Бу миңа кагылмый”.

Иң истә калган голы турында: “Еш кына уенны үз кулыма алам. “Уфа” капкасына керткән бер голым истә. Ул чакта туп белән ярты кырны йөгереп узган идем”.

Иң истә калган уен турында: “Казанда уйнаган вакытта булды. “Ливерпуль” командасына каршы” (2015 елның 5 ноябрендә Европа лигасының “Казан Арена”да узган матчын (0:1) карарга 41 меңнән артык тамашачы җыелган иде – ред.)

Карьерасын тәмамлау турында: “Соңгы матчымны Казанның “Рубин” составында уздырыр идем. Аларны һәрчак күзәтәм, команда өчен борчылам”.

Фото: http://www.pfcsochi.ru/